ភ្នំពេញ៖​ អយ្យការអមសាលាដំបូងរាជធានីភ្នំពេញបានសម្រេចបើកការស៊ើបសួរលើមនុស្ស៩នាក់ ដែលថាពាក់ព័ន្ធនឹងការញុះញង់បំផុសបំផុលក្រុមអតីតបុគ្គលិកក្រុមហ៊ុនណាហ្គាវើលដ៍ធ្វើសកម្មភាពបង្កចលាចលដល់សណ្ដាប់ធ្នាប់របៀបរៀបរយសាធារណៈ និងអាចបង្កឱ្យមានអសន្ដិសុខដល់សង្គម។

មនុស្សទាំង៩នាក់នោះរួមមានស្រីចំនួន៧នាក់ដែលរួមមាន ឈឹម ស៊ីថរ, រី សុវណ្ណឌី, សុន ស្រីពេជ្រ, ហៃ សុភាព, ឃ្លាំង សុបិន្ត, ទូច សិរីមាស, ឈឹម សុខន និងបុរស២នាក់មានឈ្មោះ សុខ ណារិទ្ធ និង សុខ គង្គា។

ក្នុងសេចក្ដីប្រកាសព័ត៌មានរបស់អ្នកនាំពាក្យអយ្យការសាលាដំបូងរាជធានីភ្នំពេញបានបញ្ជាក់ថា៖ «បន្ទាប់ពីបានធ្វើការស៊ើបអង្កេត ស្រាវជ្រាវ និងប្រមូលភស្ភុតាងរួចមក អំពើដែលបានប្រព្រឹត្តខាងលើបានបំពានច្បាប់ដូចមានចែងក្នុងមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ ដោយផ្អែមតាមអង្គហេតុ និងអង្គច្បាប់ខាងលើនេះ អយ្យការអមសាលាដំបូងរាជធានីភ្នំពេញបានសម្រេចបើកការស៊ើបសួរលើបុគ្គលខាងលើរួមទាំងបក្ខពួកពីបទ “ញុះញង់បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម” តាមមាត្រា៤៩៤ និងមាត្រា» ។

រហូតមកដល់ថ្ងៃនេះឈានចូលដល់ថ្ងៃទី១៦ហើយដែលអតីតកម្មករក្រុមហ៊ុនណាហ្គាវើលបន្តធ្វើបាតុកម្មនៅសួនមុខណាហ្គាវើល ក្នុងខណ្ឌដូនពេញ រាជធានីភ្នំពេញ ដើម្បីទាមទារឱ្យក្រុមហ៊ុនគោរពច្បាប់ការងារទទួលពួកគេចូលធ្វើការវិញ និងសងសំណងសមស្របជូនពួកគេ។ ទោះជាយ៉ាងណាជម្លោះរវាងក្រុមហ៊ុននិងកម្មករនិយោជិតនេះទោះបីមានការសម្របសម្រួលពីរាជធានីភ្នំពេញ និងក្រសួងការងារយ៉ាងណាក្ដីក៏មិនទាន់អាចស្វែងរកដំណោះស្រាយបាននៅឡើយទេ។

ក្នុងសេចក្ដីបំភ្លឺកាលពីថ្ងៃទី១ ខែមករា ឆ្នាំ២០២២ ស្នងការដ្ឋាននគរបាលរាជធានីបានចាត់ទុកសកម្មភាពបន្តតវ៉ារបស់អតីតកម្មករទាំងនោះជាសកម្មភាពខុសច្បាប់មិនស្ដាប់តាមការអំពាវនាវរបស់អាជ្ញាធរ ធ្វើឱ្យប៉ះពាល់ដល់សណ្ឋាប់ធ្នាប់សាធារណៈ និងសុវត្ថិភាពសង្គម ដែលមានវិធានការឃាត់ខ្លួនមនុស្សជាបន្តបន្ទាប់៕